岑應搵名人變臉　添食搞整容真人騷

無綫近呢兩年製作嘅綜藝資訊節目《盛女愛作戰》同《求愛大作戰》，因為節目中嘅盛男盛女都夠晒騎呢兼出位，所以播映時都掀起城中話題，收視都唔錯。呢兩個節目嘅編導岑應最近又受命籌備出年第三輯新節目，為咗再成城中話題作，佢最近頴爆頭度橋，據知佢𠵱家其實有兩個構思揀緊，首選係拍攝整容真人騷，次選就係年輕人創業真實個案，但係論八卦同過癮程度，就梗係整容真人騷比較吸引同有娛樂性，至於後生仔創業，內容係好實用，不過放工仲睇呢類要思考嘅題材就會有啲沉悶。
其實《盛女》同《求愛》兩輯節目入面，盛男盛女為咗搞靚儀容，都有做一啲簡單嘅醫學美容，所以整容對岑應嚟講，搜集資料方面應該唔算大困難。有指佢有意揀幾對男女素人去韓國進行大變身，全程直擊，等觀眾睇住醜男醜女點樣齊齊變成韓國明星咁款嘅靚人，然後仲會帶出佢哋背後嘅感性故事，同埋探討整容後，面對旁人眼光嘅感受。

[img]http://static.apple.nextmedia.com/images/apple-photos/apple/20130819/large/20130819c14g1a.jpg[/img]
■岑應如果真係決定搞整容真人騷，就會帶埋參賽者去韓國由頭執到腳。設計圖片及對白


[img]http://static.apple.nextmedia.com/images/apple-photos/apple/20130819/large/19ec10p1a.jpg[/img]
■《求愛》同《盛女》節目編導岑應有意出年籌備整容真人騷。
資料圖片

[img]http://static.apple.nextmedia.com/images/apple-photos/apple/20130819/large/19ec10p2a.jpg[/img]
■整容整上癮嘅Queenie，最啱上節目分享整容經驗。
資料圖片


[b]分享慘痛經歷[/b]
聽講為咗增添娛樂性，節目入面唔排除會力邀一位知名人士一齊參與，好似整容整上癮嘅美容達人陳莉敏（Queenie），由頭到腳整過20次，佢好大機會再現身節目分享佢喺整容時遇到嘅辛酸同慘痛經歷。
到底岑應係咪決定咗搞整容真人騷，係咪都搵Queenie助陣，岑應噚日喺電話中回應：「未定實，有消息先同大家講。」




來源:蘋果日報網站